CHAMAMOS Á CONVERXENCIA E Á ACCIÓN

¡HAI QUE FACER FRONTE AO ABUSO!

As mulleres e homes que asinamos este chamamento facémolo porque cremos urxente espertar a conciencia da opinión pública, é urxente que a cidadanía pase á acción. Cremos imprescindible actuar canto antes para frear os abusos que gobernos, banca e grandes empresas están acometendo contra os traballadores e traballadoras, contra os desempregados/as, contra milleiros de xóvenes a quen lles espera un futuro de precariedade e mal vivir, contra os pensionistas e contra os pequenos e medianos empresarios.

A este escenario chegamos despois de décadas de exercicio económico apoiado na ideoloxía do denominado neoliberalismo. Unha práctica de dominación que se executa a través da posta en circulación dun pensamento económico totalizador e que contamina o social e o político, reestructurando a organización social das nosas sociedades, globalizando unha maneira de exercer as actividades económicas de mercado e instrumentalizando a política para beneficio dos seus intereses.